濕疹濕滯唔濕滯?(第一回)

春分啱啱過去,清明即將黎臨,中間仲有個愚人節。正所謂「清明時節雨紛紛」,香港春天向來好濕,對於患有濕疹嘅病人黎講,呢個季節往往都好辛苦,甚至d濕疹生到、痕到「路上病人欲斷魂」嘅地步,簡直係日日愚人節,俾D瘡玩死。濕疹往往好似好難痊癒,濕滯到不得了。今日,我地就黎講下濕疹呢個病。

濕疹,中醫又叫濕瘡、浸淫瘡、粟瘡等等,主要表現可以見身體皮膚出現對稱性嘅潮紅、丘疹、水疱、膿疱、結痂等等多形性損害,伴有痕癢、糜爛、流滋等,或者病人皮膚會增厚、粗糙等。呢個病往往反覆遷延難愈,好濕滯。雖然濕滯,個名又叫濕疹,但係唔係所有濕疹都係濕氣鬱滯所引起,然後食D利濕嘅中藥就醫得好呢?你見我咁問得,就知道唔係啦。

上一篇文都講到,中醫就好似偵探推理咁,又好似捉棋要睇透整個棋局咁,醫人就要考慮呢個病係點樣、點解發生(病因),隨住時間有咩野發展、變化(病機),患者本身點影響個病機,個病又點樣影響患者本身等等,思考背後嘅原因同機理,然後訂立治法去治療。由始至終,中醫講求點樣醫好個「人」。《丹溪心法》作者Danks Chu朱丹溪話:「有諸內者形諸外。」濕疹嘅問題,往往唔係單單表面皮膚ge問題,而係反映內裡五臟六腑嘅問題,只係醫皮膚而唔醫內裡嘅問題,往往醫好一陣又復發,原因無他,源頭問題未解決,又點會醫得好(上篇林鄭唔封關論又可以搬出黎用下)。接下黎,我會講下濕疹嘅成因,以及一D處理方法。

濕疹叫得做濕疹,的而且確,好多時(但不是全部)係同濕邪相關。中醫認為,濕邪重濁黏滯,成日痴住人唔放,所以濕滯係真係好濕滯,同濕相關嘅疾病,往往都反覆遷延。濕邪又分外濕同內濕,外濕係指感受外在嘅濕邪,而內濕係因為內在五臟六腑嘅問題所引起嘅濕邪,而濕邪多同肺、脾、腎、膀胱、三焦相關(但唔代表其他臟腑完全無關,因為人係一整體)。由濕邪所引起嘅濕疹,通常同內濕外濕都有關,兩者合而為病。因此,治療上除左要祛濕利濕之外,同時要醫治病人內裡本身嘅毛病,脾虛嘅要補脾健脾,腎虛嘅要補腎,肺虛嘅要補肺……(下刪一萬字),咁樣先做到Danks Chu所講「內外相參而治之,則萬舉萬全之功」。

忠醫診所呈獻:秋冬湯水 (一)
決戰忠醫館
《花之呼吸 — 秋冬滋潤,寧神芪茶》
《曹醫師話你知:點解你有肩周炎(又稱五十肩)?!》
關注一下,你的暗瘡、小粉刺
食糭食到滯
Share This