濕疹濕滯唔濕滯?(最終回)

濕邪唔係引起濕疹嘅唯一原因。同一般人印象唔同,濕疹其實可以係燥邪引起,上面講話病人皮膚增厚、粗糙呢種濕疹,通常就同燥邪相關。同濕邪一樣,燥邪都可以分內外,外燥係感受外在燥邪,而內燥係由於內在五臟六腑ge問題所引起,導致主滋潤嘅津液、陰血不足,無以滋潤皮膚,或者因為氣血經絡不通,津液、陰血去唔到皮膚滋潤所致。因此,治療上以滋陰潤燥為主。如果呢類病人仲自己食d利濕藥,就同抽單身狗水一樣,愈抽愈dry。所以,都係個句,有病就應該睇醫師,唔好亂咁食藥。

判斷病人疾病狀態係醫師嘅責任,開藥亦係醫師嘅責任,但去睇病,同埋遵照醫師指示,就係病人嘅責任。除左要跟醫師指示食藥,生活上亦都有d要注意。其實都係D講到口臭嘅野,早睡早起,少食辛辣、肥膩、生冷嘅食品,少飲酒,唔好成日「借問酒家何處有」,雖然多得林鄭個條完全唸唔明嘅酒吧禁酒令,去到都冇得飲,再者我又唔係牧童,我亦都唔知杏花村有咩黃店酒吧。

最後,介紹兩條外洗方,幫助各位濕疹患者舒緩濕疹患處。注意,係外洗方,唔好拎黎飲。

1. 黃絲祛濕洗劑

大黃、黃連、黃柏、苦參各3錢

用1升水煲15分鐘,去滓,待涼後用毛巾抹患處,每日1次。適用於濕疹而伴見皮膚潮紅、痕癢、糜爛、流滋者。皮膚乾燥、粗糙者忌用。

2. 修皮潤膚洗劑

桑葉、薄荷、防風、當歸各3錢

用1升水煲15分鐘,去滓,待涼後用毛巾抹患處,每日1次。適用於濕疹而伴見皮膚乾燥、粗糙者。

濕疹雖然可以幾濕滯,但又唔一定係濕滯引起。不厭其煩咁講多次,濕疹嘅原因有好多種,不過,唔係每隻方藥都係啱患者自己去食。係食任何中藥之前,請先咨詢中醫師。如果你有呢方面,或者任何其他方面嘅唔舒服,歡迎前來忠醫診所求診。

忠醫診所呈獻:秋冬湯水 (一)
決戰忠醫館
《花之呼吸 — 秋冬滋潤,寧神芪茶》
《曹醫師話你知:點解你有肩周炎(又稱五十肩)?!》
關注一下,你的暗瘡、小粉刺
食糭食到滯
Share This