fbpx
濕疹濕滯唔濕滯之#NMSL (#你咩濕哩) (最終回)

黎到濕疹系列威力加強版既最終回,想講講不論係已經患上濕疹,定係未患上而想預防濕疹,又或者係濕疹好番而唔想番發,都應該有注意事項。其實要講呢個,就同五毛講 #nmsl 一樣,都係無咩新意既野。當然,同五毛唔同,我地中醫唔係因為俾泰國人寸到一棟都冇,先至冇野好講,而係因為見太多太多病人都係因為差唔多原因發病,都係犯埋差唔多既錯,所以次次要講既野都差唔多。五毛淨係識講 #nmsl,今日我就用 #nmsl 黎講下濕疹要注意既野啦。

N: Nutriment (飲食)
講真,要數濕疹有咩要戒口,可以數到天昏地暗,數到你懷疑人生,數到你頹到不如由得濕疹生算。坦白講,我都好鍾意食野,正所謂戒口仲難受過死(我都聽唔少病人會咁講),所以,我唔會叫你戒到清晒,但有樣野好重要,身體健康係你自己既,醫師既責任係話俾你聽點樣可以令身體健康,並且按病情去治療,但接唔接受係病人自己選擇,唔接受既後果,亦係病人要承擔既責任。

雖然我一般唔會叫病人戒到清,但有D野都係少食為妙。首先,係香港人至愛:生冷野,即係魚生壽司雪糕雪條凍野飲。寒濕引起既濕疹病人固然唔應該食,濕熱病人都唔好以為食凍野可以中和d熱,係唔work既,除左因為凍野本身易加重濕之外,濕熱既人食太多凍野,往往唔係醫好熱,而係變得寒熱錯雜,令病情更加複雜難醫。另外,辣野、炸野、蝦、蟹、貝殼類,都應該少食。講左咁多,其實有個原則簡單黎講,如果你食左樣野,發覺會引起或者加重濕疹,咁唔好意思啦,請你真係暫時戒左個樣野。其他野食係可以,但唔好食多,適量就好。

M: Mood (情緒)
香港人,壓力大,機器壞,對住呢個不知所謂既政權,有邊個人會情緒好,呢一點,我非常理解,因為醫師我都一樣。不過,要講既始終要講,情緒差,壓力大往往會引發或者加重濕疹,有病人會話一工作忙,濕疹就黎。每個人減壓方法都唔同,我會聽下音樂、煲下動漫,武漢肺炎之前會落街跑個步,俾個時間自己,暫時脫離下呢個世界。希望你都可以搵到屬於自己既減壓方法,不過如果已經係有情緒問題一段時間,咁我都建議你去搵社工輔導幫忙。

S: Sleep (睡眠)
如果你去睇中醫,俾佢知你夜訓,咁我好肯定咁答你,10個中醫,有11個都會鬧你。夜訓,唔只係對濕疹唔好,對五臟六腑、成個人都唔好,好傷架。以前被迫係鄰國實習時,病人遲過10點訓就即鬧。當然,對好多香港人黎講,10點都唔知可以放工番到屋企未。一般黎講,我會希望病人可以11點前訓,最遲唔過12點,偶爾有事夜D無所謂,但最好習慣早D訓。如果個人平時慣左1、2點甚至3、4點先訓,我會叫佢慢慢tune番早訓,先比平時早一個鐘,慢慢tune到十一、二點。不過,如果你本身係有失眠問題,咁就要另計,係要醫既。順便預告下,5月我地就會探討失眠問題,到時我地再講多D。

L: Less (少)
講左咁多,其實都想帶出一點,就係適可而止。食野可以食,但唔好食咁多。壓力大家都有,但要識去減。夜訓偶然可以,但唔好晚晚到搞到3、4點。好多人會問,生左濕疹或者預防濕疹,食D咩、做D咩好。當然,我係上幾期都介紹左d食療、外洗方俾大家,但係比起做多D咩、食多D咩,反而係做少D咩、食少D咩更加重要。

4月濕疹主題就暫時講到呢到,希望都可以幫到你。如果你有濕疹方面,或者任何其他方面唔舒服,歡迎前來忠醫診所求診。

《廿四節氣:秋分知多少》
《白露降臨—秋天來了》
《徐醫話你知:點解會胃病》
《性功能障礙 性福由你掌握(中)》
《立秋要見字飲水》
《大暑 – 盛載屬於你我的回憶》
Share This