fbpx
夏日炎炎不好眠(第二回)

上星期講左人點解要訓教,今個星期就講講點解會失眠。失眠,中醫叫做「不寐」,又叫「不得眠」、「不得臥」、「目不瞑」等,包括訓唔好(淺睡)、訓唔著、訓左易醒、醒左訓唔番、甚至成晚冇得訓。上次講過,人訓教係因為人要順應天地嘅運行,用中醫嘅講法,就係朝早,陽氣從陰中出黎,人就醒黎活動,到左日落。陽氣要入番陰,人就休息。失眠訓唔好,原因就係陽氣入唔番陰,中醫叫「陽不入陰」,就好似人high大左,靜唔番。同之前嘅病一樣,雖然話「陽不入陰」係失眠嘅總原因,但做成「陽不入陰」嘅原因有仲有好多,我地做中醫嘅就係搵番呢啲原因出黎,然後給予病人相應嘅治療。宜家,我會分享下,臨床上做成「陽不入陰」嘅幾個常見原因,以及日常生活可以點樣預防。

首先,係呢年黎大家都唔會陌生嘅原因:受驚。不論你係親眼見證,定係睇直播,相信都曾經令你心驚膽怯,好多人因此會訓唔著。中醫黎講,心主神,與人嘅精神、情志等相關。當人受驚,特別係本身體虛嘅人,就影響到心神,心神不安,人嘅氣血自然亦都無法好好咁運行,做成陽不入陰而失眠。如果只係一時受到刺激而訓唔到,之後心情能夠自我平伏,訓得番,咁樣固然無大問題,但如果個人本身體弱,或者受驚過大,或者持續受驚,以至經常失眠,甚至出現其他唔舒服,咁就係病,唔盡早醫嘅話,可能會發展成驚恐症等精神病,後果可以好長遠。所以,如果你有呢方面嘅問題,特別已經持續一段時間,請你盡快去求診。

至於可以點樣預防呢? 當然,我唔會叫大家對社會嘅事麻木,更唔會叫大家拋棄良心。但係,我地有必要學識有時抽離一下,唔理啲資訊。尤其如果你唔係現場,而係睇緊直播或者睇番新聞,你又覺得心驚膽怯訓唔到,咁你熄左你嘅手機、熄左你嘅電視,忍一陣唔去睇。我明白好難去忍,但咁係為你好,寧願你平伏番心情,訓個好覺,再冷靜咁唸有咩自己可以做嘅,總比係螢幕前齋擔心好。

另外,之前係陽痿個篇都有講到,可以用桂圓肉10克、枸杞子10克、紅棗2粒焗茶飲,有助寧心安神。

如果有失眠,或者其他任何唔舒服,都歡迎黎忠醫診所求診。呢星期講到呢到先,下星期再講講其他原因。

《白露降臨—秋天來了》
《徐醫話你知:點解會胃病》
《性功能障礙 性福由你掌握(中)》
《立秋要見字飲水》
《大暑 – 盛載屬於你我的回憶》
《性功能障礙 男女一樣有得醫(上)》
Share This