明年今日 別要再失眠 夏日炎炎不好眠(最終回)

明年今日 別要再失眠
用陰交印堂 神門陰虛溪腎
擔驚受怕通里氣鬱衝間
脾胃內關三里血虛血海

上星期介紹多兩個原因,壓力以及脾胃不和,都可以導致陽不入陰而失眠。今個星期會再講多兩個原因。最後亦都會介紹一啲穴位,可以透過按摩去舒緩失眠。

首先會講既係血虛。血虛可以係由於脾胃虛弱,氣血生化不足,月經失血,或者思慮勞倦過度,耗傷氣血而導致血虛。血虛,一方面令心神失養而導致失眠,另一方面,血係中醫屬於陰,陰血不足,就陽氣容易太過,導致陽不入陰而失眠,就好似天上飛機好多,但唔夠跑道降落咁 (利申:本人不贊成起三跑)。病人除左失眠之外,亦都可以見多夢易醒、心悸、頭暈,面唇色白等表現,部分人會有明確失血史(例如月經崩漏、分娩等)。對於呢類人,可以用番以前講過既食療去預防。

修理心脾方
材料:黃芪15克、黨參、當歸、桂圓肉、茯苓各9克
做法:用1公升水,慢火煮以上藥材40分鐘。

如果血虛醫唔好,咁就有可能進一步發展成陰虛,陰虛就會火旺,自然導致陽不入陰而失眠。陰虛火旺除左可以由血虛發展之外,亦都可以由於其他原因,例如房事太多、打飛機太多 (係,打飛機唔一定傷腎陽,腎陰都可以受傷)、其他久病傷陰等,婦女更年期亦都常見陰虛。通常除左見病人失眠之外,仲會兼見口乾咽燥,心煩,盜汗潮熱,腰膝酸軟等等。對於呢類人,都可以用番以前講過既食療去預防。

黑枸湯
材料:用熟地15克、枸杞子、山茱萸、淮山各9克、黃連3克
做法:用1公升水,慢火煮以上藥材40分鐘。
注意:有黃連所以味會苦,怕的話可以加紅棗3粒。另外,因熟地本係黑色,飲完如果大便變黑係正常既,所以先叫呢條食療方做黑枸湯。

最後,介紹一啲穴位俾大家,可以用黎按摩去舒緩失眠。穴位由於篇幅所限,就唔寫低,大家可以上google search下。

失眠主穴:三陰交、印堂、神門
如果係受驚過度 – 加通里;
壓力大有氣鬱 – 加行間、太衝;
脾胃不和 – 加足三里、內關;
血虛 – 加血海;
陰虛火旺 – 加太溪、腎俞。

做法:每個穴位輕揉按壓1分鐘。如果唔洗勞煩自己,有人幫你按摩就更好。

呢4個星期,講左5個失眠既成因,但我唸大家都知失眠點止5個,要講都講唔晒。所以,如果你真係有失眠問題,最好你都去忠醫診所搵醫師求診,醫師會幫到你。

最後,祝願香港人有一日,能夠毫無憂慮咁訓教。

忠醫診所呈獻:秋冬湯水 (一)
決戰忠醫館
《花之呼吸 — 秋冬滋潤,寧神芪茶》
《曹醫師話你知:點解你有肩周炎(又稱五十肩)?!》
關注一下,你的暗瘡、小粉刺
食糭食到滯
Share This