上次應承左大家一齊再了解下瑜伽同中醫點樣處理情緒問題。身處喺香港呢個繁忙都市，就算你想放慢腳步，後面嗰個都會迫你行快啲。有壓力係好正常，但唔識排解壓力，反而導致社交同身體出現問題，就要搞搞佢啦！
中醫將情感歸納成七情––喜、怒、憂、思、悲、恐、驚。人有七情係正常感情抒發嘅生理現象，但係如果七情持續太耐或者情感太過劇烈，就會影響臟腑功能同氣血運行，對我地健康造成損害。好多我地無諗過嘅疾病，好似腸胃功能紊亂、月經失調、甚至某啲癌症，都同情志失調有密切關係。要預防因為情志過劇導致疾病，我地要學識調神，例如解憂、少思、制怒、克悲、防驚化恐等，呢個時候，瑜伽就係其中一個好有效嘅方法去幫助情緒控制。
專注動作，解憂少思
無論係自己練習抑或上瑜伽堂，都需要我地專注呼吸，將意念帶到當下，將集中力放喺動作上，感受身體肌肉、筋膜嘅拉扯感。一方面可以放鬆因為情緒而導致嘅身體繃緊，另一方面暫時忘記現實嘅憂慮同不快，從而調節心情。
練習呼吸，調息制怒
當我地好嬲又唔想發脾氣嘅時候，都會深呼吸令自己冷靜落嚟。而練習瑜珈時嘅胸式呼吸、腹式呼吸、收束法(Bandha)等需要減慢呼吸節律，令能量可以透過特定氣息去到適當位置，從而發揮例如調節甲狀腺分泌、按摩內臟等功效，同時放鬆大腦，舒緩緊張暴燥。
結交朋友，面對驚恐
瑜伽可以單獨練習，亦可以有雙人瑜伽，甚至幾個同學一齊討論同幫手達至更深層嘅伸展。過程中，我地可能要走出自己嘅舒適圈同人溝通交流，亦可以搵到一齊面對挑戰嘅朋友。當大家成功做到從來無諗過做到嘅高難度動作，就會知道只要嘗試就會慢慢進步，慢慢克服恐懼。
珍惜所有，感謝身體
瑜伽課堂完結時，導師會帶領同學閉上眼睛雙手合十放胸前，講一句”Namaste”，意思係「向你鞠躬」，以表達師生之間嘅敬意同感謝。與此同時，我地亦都感謝自己為我地身體嘅付出同堅持，感謝同行嘅同學一齊成長。透過小小一個感恩嘅動作，明白並珍惜我地所擁有嘅事物。
講左咁多紙上談兵嘅理論，大家係咪都好想知道腰痛可以做咩動作舒緩？便秘可以點處理？有咩動作可以減輕經期煩躁不適等等? 記得留意第三篇實戰篇啦！
針灸及婦科庾醫師
#忠醫 #忠醫診所 #中醫 #中醫診所 #瑜珈
